BAGUIO CITY – Inyebkas ni Mayor Benjamin Magalong ti panangkablaawna kadagiti atleta, coaches ken dadduma nga staff a nangibagi iti Baguio City iti kaleppas a Batang Pinoy 2022 sadiay Vigan City.
Iti interview ti Bombo Radyo Baguio, mamati ni Mayor Magalong a ti nainget a panagsanay dagiti atleta ken ti kinalaing dagiti coaches nga agisuro ti maysa kadagiti rason iti panagkampeon ti siyudad iti nasao a kompetisyon.
Kinuna ti mayor a dakkel nga accomplishment daytoy para kadagiti atleta.
Dinakamatna a daytoyen ti maikatlo a tawen a panagkampeon ti siyudad iti Batang Pinoy gaputa naalada metlaeng ti tropeo idi 2018 ken 2019.
Impetteng ni Magalong a posible nga aghost met ti siyudad ti Batang Pinoy kadagiti sumarsaruno a tawen.
Pakabuklan a 100 ti medalya ti napangabakan ti Baguio City – 31 a gold medals, 30 a silver ken 39 a bronze.
Naiyawat pay kadakuada ti P3-million ken dadduma pay a premyo.
