BAGUIO CITY – Nakasaganan dagiti 210 nga atleta ken coaches manipud siudad ti Baguio nga agturong sadiay Cebu para iti maangay a Philippine National Games 2018 inton May 19 agingga 25.
Sigun kenni Baguio City Sports Coordinator Guadencio Gonzales, ti nasao a kompetisyon ti maikonkonsidera a national olympics ti pagilian ken kalatakan kadagiti amin nga sporting events ti Philippine Sports Commission.
Kinunana a dumanon iti 19 nga sports wenno kompetisyon ti pakipasetan dagitoy pakairamanan ti athletics ken nagduduma nga combative sports.
Innayonna nga adda met laeng dagiti dadduma a kategorya a pakipasetan dagiti PWDs nga atleta iti siudad.
Mangnamnama pay dagitoy nga agkampeon itan ti siudad ti Baguio kalpasan a nagun-odda ti maikadua a pwesto idi napalabas a tawen.
