BAGUIO CITY–Nakailistan ti Team Cordillera iti tallo a balitok a medalya ken tallo a silver wenno pirak a medalya iti panagtultuloy ti Palarong Pambansa 2018 sadiay Vigan, Ilocos Sur.
Iti panakiyuman ti Georaloy Palao-ay, information officer ti DepEd-Cordillera, kinunana a napintas ti partisipasyon dagiti atleta ti rehion iti nagduduma nga sport events kas makita iti kaudian a medal tally idi rabii.
Dinakamatna a ti kaunaan a gold medal iti Team Cordillera ket nagun-od ni Arvanson Mondata manipud Mt. Province iti tay-ak ti athletics partikular iti shotput bayat a ti dua pay a gold medal ti rehion ket nagun-od ni Cordilerra chesswiz Bea Mendoza iti chess individual ken iti chess team kaduana ni Macydel Fajardo.
Innayonna a ti tallo a silver medals ket nagun-od da Evelina Burdette iti secondary arnis girls, Izy Zyrell Pobletin iti elementary arnis girls ken Mark Alexis Martin iti elementary arnis boys.
Sigun kenni Palao-ay, namnamaenda a nayonan pay ni Mondata dagiti balitok a medalya daytoy iti panakipasetna kadagiti dadduma a throwing events.
Kinunana pay a saan a ‘dehado’ unay ti Team Cordillera ngem inaklonna a nagsagana met dagiti dadduma a rehion iti panakipaset dagitoy iti Palaro ita a tawen.
