BAGUIO CITY–Naituding a lumaban kadagiti masungad a bulan dagiti Igorot mixed martial arts (MMA) fighters a kameng ti Team Lakay iti nagduduma nga MMA promotions iti Asya ken sadiay Middle East.
Sigun kenni head coach Mark Sangiao, iti kaunaan a gundaway ket idepensa ni Stephen “The Kid” Loman ti titulo daytoy a Brave Combat Federation Bantamweight World Champion inton Abril.
Kinunana a lumaban met ni PO2 Crisanto Pitpitunge iti kapada nga MMA promotion inton March 2 sadiay Amman, Jordan ken makasango daytoy ni Brave veteran Jalal Al Daaja iti undercard.
Maipalagip nga ag-debut kuma ni Pitpitunge idi 2016 para iti maiden event iti nasao nga MMA promotion ngem nagsanud gapu iti dunor daytoy.
Innayon pay ni Coach Sangiao a manamnama a maaddaan iti laban ni sigud nga ONE Championship lightweight world champion Eduard Folayang kadagiti sumarsaruno a bulan. naamuan met a sumagmamano nga Igorot fighters ti naituding a lumaban iti cage ngem saan pay a mabalin a maiwaragawag gapu iti pinirmaan dagitoy a kontrata.
