BAGUIO CITY – Irekomendar ti Commision on Elections (COMELEC)-Baguio iti Department of Education-Baguio ti panagala kadagiti ub-ubbing ken adda ammona iti teknolohiya a mannursuro nga agserbi kas Board of Election Inspectors iti 2021 National and Local Elections.
Iti panakiyuman ti Bombo Radyo Baguio, kinuna ni COMELEC-Baguio Election Officer John Paul Martin a kagiddan daytoy ti panagsaganada iti agbalin a panagbaliw iti panagsanay dagiti mannursuro ken dadduma pay nga indibidual nga agserbi kas Board of Election Inspectors.
Dinakamatna a kasapulan dagiti electoral board nga adda panakaamona iti digitals ken online platforms gaputta dumurdur-as itan ti sektor ti teknolohiya nga isu met ti ad-adaptaren ti kaaduan nga opisina ti gobierno kas wagas iti panangipaayda iti serbisyo.
Imbinglayna nga awan pay ti umno a bilang dagiti agserbi a BEIs agingga nga awan ti pinal a bilang dagiti botantes ti siudad iti masungad nga eleksion.
Iti baet daytoy, namnamaenna a maysa kadagiti pagbaliwan iti agdama ti posible nga online a wagas ti umuna a parte ti panagsanay dagiti mannursuro.
Kinunana a masapol itan ti sertipikasion manipud iti COMELEC ken digital signature dagiti agbalin nga electoral board.
Kitkitaenda pay makunkuna nga hybrid nga operasion kabayatan ti eleksion nangruna ta kasapulan ti face to face ti wagas ti panagbutos.
Malaksid kadagiti mannursuro, maipasidong pay iti panagsanay ti pulisya nangruna iti sumagmamano a paset ti rehion kas iti probinsia ti Abra.
