BAGUIO CITY – Maangay inton Miyerkoles, August 1 ti technical conference para iti maatap nga iligal a panakaibelleng dagiti hospital waste iti paset ti Marcos Highway Watershed Forest Reserve.
Sigun kenni Environmental Management Bureau (EMB) – Cordillera regional director Reynaldo Digamo, pinaayabanna ti management ti Baguio Medical Center ken ti kontraktor a ni Onofre Calam-ang tapnu malawlawagan ti isyu, pakairamanan ti panakailanad ti isyu ken detalye, ti panakaipaay ti commitment ken implementasyon dagiti remedial measures.
Naiserbi ti maysa a ‘notice’ iti ospital gapu iti panaglabsing kadagiti kondisyon ti naipaay nga Environmental Compliance Certificate daytoy kalpasan a naduktalan a nagtaud kadakuada dagiti hospital waste a karaman iti daga a naibelleng sadiay Bayacsan, Taloy Sur, Tuba.
Sumango pay ti ospital ken ti kontraktor iti kaso a panaglabsing iti Toxic Substances and Hazardous and Nuclear Wastes Control Act ken iti Clean Water Act.
Naamuan nga agarup 100 a sako ti hospital waste ti nakolektar manipud iti nakaibellengan dagiti nasao a basura.
Naamuan pay a ti Barangay Taloy Sur ket maibilbilang a paset ti Marcos Highway Watershed Forest Reserve.
