BAGUIO CITY – Naibutaktak ti nagbalin nga anomalya iti Mr. and Miss Benguet 2019 a paset ti selebrasion ti Adivay Festival.
Maibasar iti official statement ti lokal a gobierno ti Kapangan, Benguet, adda ti anomalya ken iregularidad a napasamak kabayatan ti cornonation night ti pageant.
Kinumpirmar met ni Benguet Vice Governor Johny Waguis nga adda ti technical error iti coronation night bayat a sigun iti Kapangan-LGU ket adda ti napasamak a human error.
Maipalagip a nakoronaan kas Mr. Benguet ni Mr. Atok bayat a Ms. Benguet met ni Miss Kibungan.
Nupay kasta, naduktalan iti imbestigasion ti komite ken dagiti maseknan nga indibidual ti iregularidad iti panangipaay iti iskor kadagiti kandidato iti sports wear competition.
Naamuan a nagulo ti tabulation iti partikular a kompetision no sadino maikadua iti pwesto dagiti nangibagi iti Kapangan ngem nagtinnag dagitoy iti rank 12 iti final tally.
Gapu iti daytoy, saanen a naorganisa ti tabulation a nangitunda iti panakagulo ti ranggo dagiti top 5 iti kompetisyon.
Nailanad pay iti official statement ti Kapangan LGU a narigatanda a makipatang iti maseknan a tabulator ngem nakapatangda metlaeng daytoy.
Napagnunumuan ti dua a benneg nga agtalinaed kas Mr. and Ms Benguet 2019 dagiti immunan a nakoronaan a da Mr. Atok kenni Ms. Kibungan bayat a kaunaan a Mr. and Ms. Benguet Adivay dagiti panakabagi ti Kapangan, Benguet a da Amie Rose Pitas ken Novy Jones Aban.
Kinumpirmar pay ti nasao a munisipyo iti Bombo Radyo a dagiti pudpudno a nangabak iti pagaent ti mangibagi kadagiti aktibidad iti probinsia-awan ti sabali no di ni Mr. ken ni Ms. Kapangan.
Maangay ti special coronation awarding inton Lunes, December 23 sadiay Benguet Capitol grounds.
