BAGUIO CITY – Bimmaba iti 11% ti teenage pregnancy iti Cordillera kagiddan ti panagraira ti COVID-19 idi 2020.
Sigun iti Commission on Population and Development-Cordillera, nailista ti Philippine Statistics Authority ti 2,468 a live births kadagiti agtawen iti sangapulo agingga sangapulo ket siyam nga ina.
Kinunana a nababbaba daytoy no idilig iti 2,799 a live births a nailista idi 2019.
Iti entero a rehion, nailista ti Benguet ti kangatoan nga insidente ti Teenage Pregnancy a dumanon iti 952, sarunoen ti Ifugao a nakailista ti 368 a live births, 356 iti Abra, 298 iti Kalinga, 272 iti Mt. Province ken 222 iti Apayao.
Sigun kenni Magdalena Abellera, Regional Director ti POPCOM-Cordillera, makapaalarma ti uray maysa laeng nga insidente ti teenage pregnancy gaputa ubing pailaeng daytoy ket addaanen ti responsibilidad imbes nga agad-adal.
Kinunana a nupay bimmaba ti teenage pregnancy iti Cordillera gapu iti lockdown restrictions ket parikut latta daytoy iti komunidad nangruna kadagiti agtutubo.
Dinakamatna a dagiti daduma ket biktima ti panagrames kas maibasar iti report ti pulisya bayat a dagiti daduma ket nasapa a nakipagrelasion iti nangatngato ngem iti edad dagitoy.
Kagiddan iti daytoy, impaganetget ni Abellera ti kinapateg ti umno nga edukasion kadagiti agtutubo tapno mailiklik dagitoy iti premarital sex.
Napateg metlang ti papel dagiti nagannak a mangigiya ken mangbangtay kadagiti anakda tapno maipaayanda ti napintas a masakbayan.
