Agay-ayam iti 6 agingga 8°C ti temperatura a mapaspasaran iti agdama idiay Atok, Benguet.
Iti panakiuman ti Bombo Radyo kenni Atok Mayor Franklin Smith, posible pay a bumaba ti temperatura iti nasao a munsipyo kadagiti sumarsaruno nga al-aldaw ken posible a mapasaran ti andap wenno frost nangruna idiay Paoay.
Impasigurado ti Mayor a nakasagana met dagitoy nu mapasamak iti andap nangruna dagiti mannalon gapu ta kadawyanen daytoy a mapaspasaranda.
Kinuna ni Mayor Smith a ti maysa a wagas nga ar-aramiden dagiti mannalon tapno saan a madadael ti mulada tunggal agandap ket ti panangsibugda kadagiti mula tapno marunaw dagiti yelo a mabalin a makadadael kadagiti mula.
Kabayatanna, agtultuloy ladta ti isasangbay dagiti turista iti laksid a nalam-ek ti temperatura a nangrugi idi Nobyembre idi napalabas a tawen.
Imbinglay ni Smith nga uray nu panawen iti panagtutudo a kas iti bulan ti Hulyo ket adda ladta dagiti turista a sumangsangbay.
Innayon pay ti Mayor a napintas ti sumarungkar iti nasao a munsipyo iti agdama gapu iti panagukrad dagiti sabong.
Kabayatanna, nagpalagip ti Mayor kadagiti turista a sumangbay iti munisipyo ti Atok a kasapulan nga agaramat dagitoy iti naimeng a jacket tapno saan dagitoy nga agsakit kasta met ti panagannadda iti panagbyaheda.//Bombo Mera Pacpacan
