BAGUIO CITY – Bimmagsak iti 6.0 degrees celsius ti temperatura sadiay Mt. Sto. Tomas, Tuba, Benguet.
Segun kenni Pag-asa Baguio Weather Forecaster Danny Galati, ti panagbaba ti temperatura ket epekto pay laeng ti northeast moonsoon nga agraraira iti intero a pagilian.
Kinunana a posible a bumaba pay ti temperatura ditoy siudad ti Baguio ken iti probinsya ti Benguet ita a bulan ti Pebrero.
Kinunana nga itay alas sais ti agsapa ket bimmagsak iti 8.0 degrees celsius ti temperatura ditoy siudad manipud iti 8.5 degrees celsius a nailista itay alas singko ti parbangon.
Kabayatanna, dumanon met iti 4.0 degrees celsius ti temperatura iti Mt. Pulag Summit sadiay Kabayan, Benguet iti baet ti mapaspasaran a panagarbis sadiay isut gapuna a temporaryo a nairikep manipud kadagiti turista ti panagkalay-at iti nasao a bantay.
Nailista met ti andap iti sumagmamano a paset ti Madaymen, Kibungan; Cada, Mankayan ken Paoay, Atok iti probinsya ti Benguet.
