Temporaryo nga inpawil ti City Engineering Office (CEO) ti naaramid a temporaryo a parking area idiay Gibraltar wenno paset ti Wright Park nga abay ti pagkabkabalyuan.
Sigun kenni Barangay Chairman Julius Ampal ti Barangay Lualhati, napagdesisyonan babaen iti maysa a barangay resolustion a mapagbalin a paradaan ti paset ti nasao a parke gapu iti parikot ti pagparadaan nangruna kadagiti turista.
Inayonna pay a pati dagiti national road ket pasaray a maparadaan nangruna iti peak season.
Inlawlawagna pay nga apaman a napagnunumuan a mapagbalin a temporary parking area ti nasao a kalsada , adda dagiti nadutokan nga agbantay sadiay a tumulong a manglinis. Impeksana nga awan ti makolekta a parking fee manipud kadagiti agparada sadiay no sadino voluntary laeng daytoy.
Sigun pay kenkuana, sakbay a naaddaanda tii Barangay resolution, impakadadan iti CEO nu mabalin a mapagbalin a paradaan ti nasao a pasdek. Nupay kasta, saan a mabalin gapu ta paset daytoy iti national road.
Iti baet dayta, inlawlawag ni Ampal nga idi napalawa ti nasao a kalsada, napanunotda a agisumitir iti Barangay Resolution para kadagiti turista nga agparada.
Nupay kasta, temporaryo a nairikep daytoy ita a bulan gapu iti issue a nagviral iti social media seknan iti maatap a panagsingir dagiti Barangay Tanod iti parking fee no sadino mapapati a dakkel ti nagbalin a kita ti barangay babaen iti panagkolektada iti parking fee sadiay.
Inlawlawag met ni Ampal a saan a makontrol ti Barangay dagiti amin a tao na ngem inyunay-unayna a nainget met a nabilin dagiti nadutokan nga agbantay iti parking area a saanda nga agsingir kadagiti agparada sadiay.
Kagidan dayta, pinaglibakan ti opisyal ti alegasyon a dakkel ti maal-ala ti barangay babaen iti panagsingir.
Iti agdama, nupay naiparikkep daytoy, araramiden latta ti Barangay ti kabaelanda kadua ti siudad tapno masolusyonan ti parikutda iti parking area.
“We are looking forward nu kasanu tayo nga maadresan dyay parking problem ti bisita tayo”, sigun kenni Ampal.
Kinuna ni Ampal nga adda man ti maararamat ita a paradaan ngem agarup trenta laeng ti kapasidad daytoy ken imanmanehar daytoy ti claimants.
Sigun iti Brgy Chairman, nasaysayaat kuma nu ti siudad wenno ti Barangay ti mangimanehar iti daytoy.
Kabayatanna, mangnamnama met daytoy a malpasen ken maaramid a nasayaat ti Multipurpose Building a nabayagen a maipaspasdek tapnu agbalin nga operational a mabalin a mangcater iti agarup 60-80 a lugan nangruna ta pasaray maparadaan ti igid ti kalsada manipud Pacdal Circle agingga iti DBP Outlook. // via Bombo Vy Organo
