BAGUIO CITY – Palpalawaen pay ti lokal a gobyerno ti Baguio ti kapasidad ti Temporary Treatment and Monitoring Facility (TTMF) ti siudad para kadagiti pasyente ti COVID-19 nga awanan ti sintomas, dagiti mild case ken dagiti maatap a kaso nga awanan ti isolation space iti pagtaengan dagitoy.
Sigun kenni City Health Officer Dr. Rowena Galpo, manarimaan ti panangpabaro ti lokal a gobyerno iti Santo Niño Hospital a maysa nga TTMF accredited facility ti Department of Health (DOH) tapnu mapalawa ken agbalin nga 80-bed capacity manipud iti agdama a 45.
Dinakamat ni Galpo a manarimaan metlaeng ti re-classification ti Teacher’s Camp manipud iti agdama a temporary holding area para kadagiti returning OFWs tapnu agbalin a DOH – accredited TTMF.
Sigun kenkuana, maitunos daytoy iti puntirya ti lokal a gobyerno a maaddaan ti siudad iti 150 a bed capacity para iti temporary treatment and monitoring.
Innayonna nga iti 129-bed capacity ti pasilidad ket madanun ti Baguio ti maikalkalikagum a 1 is to 2,500 population ratio.
Impasigurado pay ni Dr. Galpo a babaen iti Baguio City General Hospital and Medical Center ken dagiti lima pay a pribado nga ospital iti siudad ket agtaltalinaed a manageable dagiti kaso ti COVID-19 ditoy Baguio nga addaan ti 30.77 percent a Critical Care Utilization Rate.
Kagiddan iti daytoy, naminsan manen nga inyapelana ti kooperasyon ti amin nangruna iti panaka-obserbar dagiti minimum health standards kas iti regular ken umno a panagsuot iti face mask, regular a panag-ugas ti ima ken physical distancing.
