Imbilin ni Benguet Governor Melchor Diclas iti Benguet Schools Division Office ti temporaryo a pannakasuspendir ti panagsuot iti uniporme dagiti estudyante nga adda iti elementary ken high school level gapu iti ngumatngato a kaso ti dengue iti probinsiya ti Benguet.
Maibasar iti datus ti Benguet Provincial Health Office, manipud iti 3,125 a kaso ti dengue manipud Enero agingga Hulyo iti agdama a tawen ket adda ti lima nga indibidual a pimmusay.
Sigun pay iti Benguet Provincial Health Office, ngimmato ti kaso ti dengue ita a tawen iti 244% nu idilig idi napan a tawen iti kapada a bulan.
Kaadoan kadagiti natamaan iti nasao a sakit ket dagiti agtawen iti lima agingga dua pulo.
Gapu iti daytoy, ginuyogoy ni Governor Diclas dagiti estudyante nga agsuot iti long sleeves ken pantalon.
Imbilin pay ti gobernador kadagiti pagadalan ti regular a panagdalus iti uneg ken ruar ti school premises tapno madalusan dagiti mabalin a pagitlogan dagiti lamok.
