BAGUIO CITY – Imimbestigaran dagiti otoridad ti panagraut dagiti mapattapatta a tallopulo a kameng ti New People’s Army iti temporary base ti pulisya sadiay Malibcong, Abra idi rabii.
Iti panakiuman ti Bombo Radyo kenni PSI Marcy Grace Marron, panakangiwat ti Abra PNP, kinunana a sinerrek dagiti rebelde a miembro ti Kilusang Larangang Guerilla North Abra ti abandonado a balay ti mayor ti Malibcong nga agserserbi a temporary base dagiti pulis gaputa maipaspasidong iti konstruksyon ti istasyon dagitoy.
Kinunana a naaddaan iti rinnupak ti dua a benneg a nagpaot iti sangapulo a minutos sakbay a bimmalaet dagiti elders ken kinasaritada dagiti NPA nga isardengda ti agpaputok tapnu saan a mairaman met laeng dagiti sibilyan.
Sadiay a pinalawlawagan dagiti NPA dagiti pulis ken inalada dagiti kagawaan dagitoy pakairamanan ti pito nga M16 rifle, maysa a caliber 45, uppat a mobile phone, maysa a laptop, ken dadduma pay nga armas sakbayda a naglibas.
Awan met ti nailista a pimmusay wenno nadangran iti nasao nga insidente.
