BAGUIO CITY–Tuttutukan ita dagiti maseknan nga ahensia ti panakaipasdek dagiti tents para kadagiti pamilya sadiay Itogon, Benguet a pimmanaw iti pagtaenganda a naipasdek kadagiti napeggad a disso ti munisipyo.
Sigun kenni Department of Social Welfare and Development (DSWD) – Cordillera regional director Janet Armas, maipaspasdek ti 53 a tents wenno emergency shelters iti Wangal Sports Complex sadiay La Trinidad.
Kinunana nga impormaran laengen daytoy ti mayor ti ili no kaano nga agakar kadagiti nasao a tents dagiti apektado a pamilya iti pito a barangay ti Itogon a naipasidong iti pre-emptive evacuation gapu iti sitwasyon sadiay.
Dinakamatna a nagkiddawda iti kanayonan a tents ken dadduma nga espasyo para iti 5,000 agingga 7,000 a pamilya.
Manarimaan met ti panakaibangon dagiti kapada a tents iti covered court sadiay Sitio Bagto ti Barangay Ucab para kadagiti dadduma a pamilya ken manarimaan pay ti profiling no asino dagiti agturong sadiay Wangal Sports Complex.
Suksukimaten pay dagiti maseknan nga ahensia dagiti pagtaengan sadiay Sitio Firstgate a natalged ken mabalin latta nga ukoparen dagiti maseknan a pamilya.
