Kiniddaw ti prosecution ti International Criminal Court (ICC) idi Biernes a maawat kas ebidensia iti kaso a crimes against humanity kontra kenni sigud a President Rodrigo Duterte dagiti immun-una a nairekord a testimonia manipud iti lima a saksi.
Sigun kenni Acting ICC Prosecutor Mame Mandiaye Niang, makatulong daytoy tapno mapapartak ti bista babaen ti pannakakissay ti oras a mabusbos iti cross examination dagiti testigo.
Karaman kadagiti lima nga ebidensiya ti maatap a normalisasion dagiti pammapatay bayat ti administrasion ni Duterte, operasion ti Philippine National Police (PNP) kontra iti illegal a droga, sistema ti gunggona kadagiti polis a nairaman iti pammapatay, ken ti maipagarup nga akem ni Duterte iti listaan dagiti puntiria dagitoy nga operasion.
Impetteng ti prosekusion a napateg ken mapagtalkan dagiti testimonia.
Innayon dagitoy a mabalin paylaeng a maipasidong iti cross-examination ti depensa dagiti lima a testigo.
Sumangsango ni Duterte iti kaso a crimes against humanity mainaig iti maatap nga extrajudicial killings kabayatan ti kampania kontra droga, a napasamak idi presidente ken mayor ti Davao City.
