Kiniddaw dagiti prosecutor ti International Criminial Court (ICC) a maawat kas ebidensia ti testimonia ti tallo a kanayonan a testigo kontra kenni sigud a President Rodrigo Duterte, nasurok a makabulan sakbay ti manamnama a panangrugi ti bista iti kaso a crimes against humanity.
Sigun iti prosekusion, makatulong dagiti testimonia a mangpaneknek iti maatap a a polisia a panangpuntiria kadagiti drug suspects babaen ti kinaranggas, pakairamanan ti pammapatay.
Dagiti saksi a nabigbig a kas P-1370, P-1393, ken P-1416 ket addaan iti impormasyon ken pannakaammo mainaig iti extrajudicial killings sadiay Central Luzon.
Karaman ditoy ti pannakaammo ni P-1393 iti panangpapatay ti maysa a pulis iti maysa a lalaki idiay San Jose del Monte City, Bulacan.
Ikagkagumaan ti prosekusion nga aramaten dagiti testimonia ken dagiti mainaig a dokumentoda kas ebidensia imbes a personal nga agtestigoda iti korte.
Ad-adda pay nga ipatalged ti prosekusion a saan a masalungasing ti karbengan ni Duterte babaen ti panangadmitir kadagitoy a testimonia, agsipudta mabalin latta a kariten ti legal team-na dagitoy bayat ti pannakabista.
