BAGUIO CITY – Nasarakanen ti bise mayor ti Tinoc, Ifugao nga immunan a naipadamag a mapukpukaw idi pay July 19.
Maibasar iti post ti anakna iti social media, nasarakanen ni Tinoc, Ifugao Vice Mayor Fernando Gapuz ken adda daytoy iti nasayaat a kasasaad.
Kinunana nga addan ti amana iti pagtaenganda sadiay Impugong, Tinoc, Ifugao.
Impeksa pay ti Pamilya Gapuz ti nalaus a panagyamanda kadagiti amin a timmulong tapnu mabirukan ti amada.
Naka-uman met ti Bombo Radyo ti Tinoc Municipal Police ngem nagkedkedda a mangipaay iti kanayonan nga impormasyon seknan iti napasamak.
Nupay kasta, kinunada nga agtultuloy paylaeng ti panangimbestigarda iti pudno a napasamak iti nasao nga opisyal gaputa saan pay a naurnos dagiti detalye.
Maipalagip nga idi July 19 ket nagturong ni Vice Mayor Gapuz sadiay Benguet para iti official business.
Naglugan daytoy iti parapasahero a bus ken bimmaba sadiay Abatan, Buguias, Benguet.
Naudi a nakita iti video footage ti CCTV camera ti panagturong ti opisyal iti direksion ti Mankayan, Benguet agingga a saanen daytoy a nagaw-awid.
