Panggep ti pagilian a Pilipinas a magun-od ti titulo a World’s Leading Beach Destination, World’s Leading Dive Destination, ken World’s Leading Island Destination ita a tawen iti umadanin a prestihioso a World Travel Awards 2024.
Idi napalabas a tawen, ti pagilian ti nabigbig kas kampeon ti World’s Leading Beach ken Dive Destination bayat nga ita a tawen ket sumagmamano a tourist destinations iti Pilipinas ti nagbalin a nominees kadagiti nagduduma a kategorya.
Ti historic a walled city ti Intramuros ket nominado kas World’s Leading Tourist Attraction 2024 nu sadino panggepna a maartapan dagiti dua pulo ket maysa a nominees kadagiti daduma a pagilian.
Kabayatanna, ti capital ti Pilipinas a Manila ket mapangpanggep a pagtalinaedenna ti titulo daytoy kas World’s Leading City Destination ita a tawen.
Ti popular a Boracay Island a pakasarakan ti world’s finest powdery white sand ket manamnama nga agbalin a World’s Leading Luxury Island 2024.
Dagiti agbalin a kakompetensya daytoy iti nasao a kategorya ket ti pagilian a United Kingdom, St. Vincent and the Grenadines, ken ti Bahamas.
Ti Cebu a popular a destinasyon gapu kadagiti natataengan a simbaan daytoy ken daduma a pasdek ket makikompetensiya para iti World’s Leading Wedding Destination 2024.
Iti sabali a bangir, nominado ti Department of Tourism (DOT) kas World’s Leading Tourist Board 2024, ti Department of Tourism (DOT) campaign a “Love the Philippines” ket nominado kas World’s Leading Marketing Campaign 2024.
Gapu iti dayta, makidkiddaw ti panakitinulong dagiti netizens babaen ti panagbotos dagitoy a mangrugi inton Oktubre baente nuebe iti agdama a tawen.
Dagiti mangabak kadagiti nagduduma a kategorya ket maideklara iti World Travel Awards Grand Final Gala Ceremony 2024 a maangay sadiay Portugal inton Nobyembre baente kwatro.
