BAGUIO CITY–Naituding a depensaan ni reigning Brave Bantamweight World Champion Stephen Loman ti titulona iti main event ti Brave 18 inton November 16 sadiay Isa, Bahrain.
Depensaan ti Team Lakay ken Igorot MMA fighter ti titulona kontra kenni Felipe Efrain ti Brazil.
Maipalagip a ni Loman nga addaan rekord a 10 wins, 2 losses ti kaubingan a kampeon ti Brave Combat Federation kalpasan a napangabakanna ti titulo kontra kenni Gurdarshan Mangat babaen ti technical knock-out iti umuna a rikos ti labanda ken naidepensana daytoy kontra kenni Frans Mlambo.
Iggem met ti beterano nga MMA fighter a ni Efrain ti rekord nga 13 wins, 2 losses ken naipaayan ti gundaway a mang-agaw iti titulo ni Loman kalpasan ti panang-abakna kenni Arnold Quero iti main event ti Brave 14 idi napalabas nga Agosto.
Kabayatanna, namnamaen met ni Team Lakay ken Igorot MMA fighter Jeremy Pacatiw a masustinirna ti panangabakna iti naituding a panagsangoda kenni Uloomi Karim inton October 27 sadiay Lahore, Pakistan.
Immuna metten a kinumpirmar ti Brave Combat Federation nga ad-adu pay nga atleta ti MMA manipud Pilipinas ti mainayon kadagiti fight card dagitoy.
