BAGUIO CITY – Ipampannakel ni Cadet 1st Class Eda Glis Buansi Marapao ti iseserrekna iti Top 10 graduating cadets ti Philippine Military Academy (PMA).
Segun kenni Cadet 1st Class Marapao, top no. 3 ti PMA SALAKNIB Class of 2017, naragsak daytoy gaputa adu a kakailian ditoy Cordillera ti naragsakan iti naragpat daytoy.
Nagyaman met daytoy kadagiti nangsupsuporta ken timmulong kenkuana tapnu maituloyna ti panagadalna iti PMA, nangruna kadagiti nagannakna.
Binalakadanna met dagiti agpangpanggep a sumrek iti akademya a saanda nga agboteng gaputa awan ti mapasamak nu umun-una ti boteng dagitoy.
Inaklonna met nga iti iseserrekna iti akademya ket saanna pay nga ammo nu anya ti agbalin a biagna ngem iti uneg ti uppat atawen ket kinunana a nasanay ken napasayaat pay ti kinatao dagitoy.
Ni Cadet 1st Class Marapao ket tubo ti Buguias, Benguet ken residente ti La Trinidad, Benguet.
Anak daytoy da Retired Army Edgar Marapao ken Helen Marapao.
Kalpasan ti makatawen a panangalana iti kurso a Civil Engineering ket nagdesisyon daytoy a sumrek iti akademya gapu iti panangguyugoy ti amana.
Sumrek daytoy iti Philippine Navy.
