Mangrugi ita nga aldaw ti Top Level Management Conference (TLMC) iti Bombo Radyo Philippines.
Maangay ti conference idiay Iloilo City ken agpaut agingga inton January 11 nga idauloan ti chairman a ni Dr. Rogelio M. Florete ken ti presidente ken Chief Executive Officer (CEO) a ni Margaret Ruth C. Florete.
Addaan ti nasao nga aktibidad iti tema a “Bombo Radyo Philippines: Celebrating 60 Years of Media Excellence.”
Pasetan daytoy dagiti station managers ken senior officers dagiti istasyon iti Bombo Radyo manipod kadagiti 25 key areas iti pagilian a pakairamanan ti Baguio City.
Manamnama a maipatungpal ti strategic planning ken direction-setting kas panagsagana ti network kadagiti sumarsaruno a tawen ti operasyon daytoy.
Kasta met a matalantan ti maipapan iti inobasyon, serbisyo publiko ken ti agtultuloy a komitment daytoy iti panangidanon iti mapagtalkan nga impormasyon, responsable ken public service-oriented a panagwaragawag.
Kabayatanna,iti 60 a tawen ti Bombo Radyo Philippines ket addaan daytoyen iti atiddog a listaan dagiti pammigbig ken pammadayaw iti tay-ak iti news reporting, public affairs programming, ken public service broadcasting a pakairamanan iti back-to-back a pangabak iti Catholic Mass Media Awards (CMMA) kas Best News Program partikular idi 2024 ken 2025, ken ti Star FM a nabigbig kas Best Entertainment Program idi 2023 agingga 2025.//Bombo Rob Dominguez