BAGUIO CITY – Pinadayawan ti Baguio City Police Office (BCPO) dagiti top performing police stations ken indibidual gapu iti dakkel a naaramidan dagitoy iti panakaisakad dagiti programa ken kampanya ti pulisya iti umuna a lima a bulan ti agdama a tawen.
Nabigbig ti BCPO-Station 7 kas top station ti BCPO iti benneg ti operational accomplishment iti panakaiserbi dagiti warrants of arrests ken 117 a warrantless arrests iti nagduduma a krimen.
Nakaawat ti Traffic Enforcement Unit iti special commendation gapu iti tallo nga aldaw ken One Time, Big Time a panangimplementarda kadagiti traffic ordinances ti siudad a nakatiliwan ti 570 a traffic violators.
Napadayawan met ni PO3 Fredy Balaki gapu kadagiti naaramidanna iti implementasyon ti Manhunt Charlie ti BCPO wenno ti panakakemmeg dagiti wanted a tattao a pangta iti komunidad ken naipaay ti special commendation kenni SPO1 Eduardo Balabag gapu iti panagkampeonna iti 2017 Mr. YMCA Body Building Competition.
Naipaay ti Medalya ng Kasanayan wenno PNP Efficiency Medal manipud Cordillera PNP kadagiti 20 a miembro ti BCPO-Civil Disturbance Management gapu iti panagkampeonda iti Regional Civil Disturbance Management Competition.
Naipaayan met iti certificates of commendation ti police auxiliary a ni Michael Corpuz ken ti security guard a ni Alison Paragas bayat a nakaawat iti certificates of appreciation da Pastor Joel Olea, Eljinor Tejano, Excel Tilado, Peter De Vera ken ti dua a sensei a da Tarcicius Mero ken Miguel Galap.
