BAGUIO CITY – Inwaragawag ti militar a dandanin magibusan ti panagturay ti terorismo sadiay probinsia ti Abra kasaruno ti balligi a panangkemmegda iti maysa a top-ranking officer ti rebelde a grupo a New People’s Army (NPA) nga addaan operasyon iti North Abra.
Nabigbig daytoy a ni Joel Sibalo Banganan alias Payas, top-ranking leader ti Komiteng Larangan Gerilya – North Abra, 37-anyos ken residente ti Mataragan, Malibcong, Abra.
Nakemmeg daytoy sadiay Damacuag, Santa Lucia, Ilocos Sur idi August 14.
Sigun kenni Lt.Col. Rodrigo Mariñas Jr., Commanding Officer ti 81st Infantry Battalion ti Philippine Army, ni Banganan ket paset ti grupo dagiti rebelde a naka-engkwentro ti militar ken pulisya sadiay Suagayan, Santa Lucia idi August 8.
Kinunana nga idi nakemmeg ni Banganan ket addaan daytoy ti sadiwa a sugat manipud iti tama ti bala ti paltog iti likod a paset ti tengnged daytoy.
Innayonna a nasagrap ni Banganan ti nasao a tama ti bala ti paltog manipud iti panakirinnupak dagitoy iti tropa ti gobyerno.
Naamuan a sumangsango ni Banganan iti kaso a rebelyon.
Kabayatanna, kadwa ni Banganan a nakemmeg ti mapapati a secretary ti NPA sadiay South Ilocos Sur a nabigbig a ni Ranny Velle Urbis, alyas ‘Maria’, ‘Nise’ ken ‘Ester’, 35-anyos, residente ti Gimud Norte, San Juan, Ilocos Sur ken addaan ti kaso a frustrated murder.
