BAGUIO CITY – Nakemmeng sadiay Purok 12, Irisan, Baguio City ti Top Most Wanted Person (TMWP) ti probinsia ti Pangasinan ken ti live-in partner daytoy idi kanikadua.
Nabigbig ti suspek a ni Arnold Castro Soriano, agtawen iti 48, ken ti live-in partner daytoy a ni Cherry Lacuata Licaycay, agtawen iti 40 nga agpada a tubo ti Pangasinan.
Maibasar iti report, iti panangiserbi ti BCPO Station 9 ken Pozorrubio PNP iti warrant of arrest kontra iti suspek gapu iti kasona a panaglabsing iti Comprehensive Dangerous Drugs Act of 2002 ket nairana nga adda ti narekober dagiti otoridad nga iligal a droga iti ikot ti suspek.
Naala manipud iti bulsa ti suspek ti innem a pakete a naglaon iti maatap a shabu ken nagduduma a drug paraphernalia.
Sigun iti BCPO Station 9, ni Soriano ket kameng ti dakkel a sindikato ti iligal a droga sadiay Pangasinan ken adda ti tallo a kaso nga immunan a naipila kontra kenkuana.
Naammuan a nangipatungpal met ti Pozorrubio Municipal Police Station iti operasion sadiay Pangasinan a nangitunda iti pannakakemmeng dagiti kakadua ni Soriano sadiay a nagresulta ti pannadangran ken pannakatay ti dadduma kadagitoy.
Inaklon met ni Soriano a kabayatan ti panaglemlemmengna ditoy siudad ti Baguio ket agturturong latta daytoy sadiay Pangasinan tapno aglako iti iligal a droga.
