![](https://img.bomboradyo.com/baguio/2020/02/swine.jpg)
BAGUIO CITY- Inbilin ni Mayor Benjamin Magalong ti total ban wenno naan-anay a pannakaiparit ti pannakaiserrek dagiti live pigs iti siudad tapno maliklikan ti panagwaras ti African Swine Fever (ASF).
Supsuportaran ti mayor ti pammilin ni Governor Melchor Diclas a pannakai-lockdown ti Benguet tapno saan a maiserrek dagiti sibibiag a baboy kalpasan a nagpositibo iti ASF ti probinsia.
Kinuna ni Magalong a saanen a mapalubusan a maiserrek ditoy Baguio City dagiti live pigs ken ti laeng mapalubusan ket dagiti sadiwa a karne, frozen ken processed pork products nga addaan iti kaskenan a dokumento.
Binallaagan pay ti mayor dagiti restaurants ditoy Baguio City nga agilaklako kadagiti arasaw wenno mabatbati a taraon a maipakan kadagiti baboy tapno isardengdan ti nasao nga aramid.
Binilin met laeng ti mayor ti City Veterinary Office a tumulong a mangipatungpal kadagiti aksion kontra iti ASF.
Maipalagip a nagpositibo iti ASF ti sumagmamano a baboy sadiay Benguet ken naipasidong iti culling wenno naigagara a napapatay ti agarup 230 a baboy a nakitaan iti sintomas ti ASF.