Kinumpirmar ti Baguio City Sports and Development Office a naituding a marugianen ti total rehabilitation ti Baguio Athletic Track Oval sakbay nga agleppas ti agdama a tawen.
Sigun kenni City Sports Officer Honorio Yamoyam, naileppasen ti naipatungpal a bidding process para iti pannakatarimaan ti substandard a track oval nu sadinno, adda ti nabigbigen a kontraktor nga agaramid iti nasao nga sports facility.
Dumanon iti agarup P120 million ti maaramat a pondo iti race track.
Ditoy a matarimaan ti sububukel a pagtarayan wenno race track tapno maiyannatup iti international standard, mairaman pay dagiti dadduma pay a playing venues para iti nagduduma nga ay-ayam iti athletics, drainage canals, alad iti aglawlaw, ken dadduma pay.
Innayon pay ni Yamoyam a naituding a maileppas ti patrabaho inton Pebrero wenno Marso inton sumaruno a tawen.
Gapu iti daytoy, makidkiddaw ti pannakataros ti publiko nangruna dagiti atleta ken coaches a saan pay a maaramat ti nasao a pasilidad iti sumagmamano a bulan.
Nupay kasta, agbalin metten a world class facility ti Baguio Athletic Bowl nu malpas ti rehabilitasyon daytoy nu sadinno ket mabalin a mangsangili ti suidad kadagiti dadakkel a pasalip nangruna kadagiti ay-ayam iti athletics.
Immuna a naipasidong iti facelift wenno pannakapapintas ti Baguio athletic bowl idi tawen 2014 ngem nakaawat iti adu a pammabalaw kalpasan a saan a nakapasa iti standard ti Philippine Athletics Track and Field Association nu sadino ababa ti inner lane daytoy a saan a dumanon iti international standard a 400 meters.
