BAGUIO CITY – Ngimmato iti 10 percent ti tourist arrival iti siudad ti Baguio idi tawen 2016 nu idilig idi tawen 2015.
Sigun kenni City Tourism Officer Benny Alhambra, kas maibasar iti inisial a datus manipud kadagiti hotel iti siudad ket dumanon iti nasurok 1,136,000 ti tourist arrival idi 2016 nu idilig iti nasurok 1,115,00 idi 2015.
Namnamaen ti opisial a ngumato pay ti nasao a bilang gapu ta manarimaan pay laeng ti panagkalapda iti datus iti nagduduma a hotel, inn ken transient house ditoy siudad.
Kinunana a maibasar iti monitoringda ket 90 percent kadagiti sangaili a simmangbay ditoy siudad ket domestic tourist bayat a 10 percent ti foreign tourist.
Sigun kenni Alhambra, karaman kadagiti Top 10 Foreign Market ti siudad ti Amerika, Korea, China, Japan, Singapore, Saudi Arabia, Canada, Australia, United Arab Emirates ken United Kingdom.
Mainiag iti daytoy ket kidkiddawen manen ti opisial ti pannakibinnadang dagiti hotels ken inns ditoy siudad tapno umno ti maala dagitoy a datus ti tourist arrival ita a tawen.
