BENGUET PROVINCE – Agtaltalinaed a silulukat dagiti tourists site idiay Sablan, Benguet.
Iti interview ti Bombo Radyo kenni Sablan Mayor Alfredo Dacumos Jr., nakalukat dagiti pagpasyaran iti nasao a municipyo malaksid laeng iti “Towing Falls” gapu iti manarimaan a koordinasyonda iti agtagikua iti dalan a pagnaan dagiti turista nga agturong iti nasao a falls.
Inlawlawagna a mabalin ti agturong iti nasao a falls ngem maiparit ti agdigus ken kasapulan nga agturongda iti tourism office tapno maipaayanda ti tour guide nga agturong iti nasao a pagpasyaran.
Innayonna a madama paylaeng ti panaka-ipinal ti Implementing Rules and Regulations maipapan iti ‘safety measures’ dagiti agturong iti Towing falls gapu kadagiti naglabas nga insidente.
Nupay kasta, mangnamnama ti Mayor a mailukat manen daytoy iti publiko inton sumaruno a tawen.
Iti sabali a bangir, kidkidawen ni Mayor Alfredo Dacumos Jr. iti Department of Public Works and Highways (DPWH) ti panakaimuntar ti cat’s eye wenno road stud kadagiti kalkalsada idiay Sablan.
Kinunana a dakkel ti tulong dagiti road stud para kadagiti motorista nangruna iti panawen a napuskol ti fog wenno angep.
Naki-koordinar metten ti municipyo ti Sablan iti Benguet Electric Cooperative tapno matarimaan dagiti daduma nga street lights nangruna dagiti nakamuntar kadagiti city road ken barangay road.//Bombo Mae Bagsang
