BAGUIO CITY – Agtaltalinaed nga adda ti trabaho dagiti kaaduan nga OFWs sadiay pagilian a Panama iti Central America iti baet ti krisis nga ituntunda ti COVID-19.
Nupay kasta, iti interview ti Bombo Radyo Baguio kenni Jhun Ballao, domestic workers sadiay Costa del Este, Panama City, Panama ket kinunana a dagiti laeng OFWs nga agtatrabaho kadagiti opisina ti naawanan ti trabaho kalpasan a nagrikep ti opisina dagitoy.
Imbingayna a tartaripatuen met dagiti employers sadiay Panama dagiti domestic workers dagitoy ken saanda a basta parparwaren dagiti empleyadoda iti amakda a makaptan wenno maakaran dagitoy iti COVID-19.
Agserserbi met a quarantine pass dagitoy ti pasaporteda iti kanito a rumwarda iti balay ti amoda ken kompleto ti protective equipment dagitoy kas iti bukodda nga alcogel, facemask, gwantes ken foot sack.
Kagiddan iti daytoy, iyap-apelada ti saan a panangbaybay-an ti gobyerno ti Pilipinas kadagiti pamilyada ditoy Pilipinas gaputa saanda unay a makapatulod ti remittances gapu iti 24-hour curfew sadiay ken iti limitado nga oras ti iruruarda.
Kiniddawda pay ti panakaipaay ti honorary consul ti pagilian sadiay Panama tapnu adda ti kamangenda no adda ti problema dagiti OFWs sadiay.
Kabayatanna, imbingay ni Ballao a nangrugi ti kaso ti COVID-19 sadiay Panama idi March 8 idi adda ti nagawid sadiay manipud Espanya a pimmusay idi March 10.
Dagus met a naibilin ti lockdown kalpasan ti insidente ken dagus a nagaksion dagiti hotel sadiay babaen iti panangidiayada iti pasdek dagitoy kas quarantine wenno isolation facility dagiti COVID-19 patients.
Mapatawan met iti community service dagiti makemmeg kabayatan ti curfew hour nga awanan ti umno a rason bayat a dagiti commercial establishments ket mamula iti 10,000 US dollars no aglabsingda iti paglintegan ti lockdown sadiay.
Dinayawna pay nga iti uneg ti 28 nga aldaw ket naibangon ti Panamian government ti Hospital Solidario para kadagiti COVID-19 patients nga addaan ti kompleto a kagawaan a maka-akomodar ti 100 a pasyente.
Adda metten ti linteg a Panama Solidario a katukad ti Bayanihan Act ti Pilipinas a mangit-ited iti 80 US dollar voucher kadagiti 1,350,000 a pamilya sadiay Panama malaksid pay iti grocery sack a maiwarwaras kadagiti babbalay tunggal kada kinsenas.
Agserserbi a battle cry sadiay Panama kontra COVID ti ‘Quedate En Casa’ a kaipapananna nga ‘stay at home’.
Iti agdama, agarup 4,500 ti nagpositibo iti COVID sadiay Panama bayat a 165 dagiti naimbagan ken 126 dagiti pimmusay.
