Kinanselar ti opisina ti Presidente ti trabaho dagiti sumagmamano nga opisina ti gobierno iti siudad ti Baguio inton bigat mangrugi iti oras ti alas tres iti malem.
Daytoy ket paset ti family month ita a bulan, no sadino addaan daytoy iti tema “Kainang Pamilya Mahalaga”.
Iti exclusive interview ti Bombo Radyo kenni Baguio City Councilor Elmer Datuin kinunana a panggep daytoy nga agbobonding dagiti tunggal pamilya babaen iti panagsasangoda a mangan iti lamisaan.
Sigun kenkuana napateg ti panagsasango dagiti nanang ken tatang tapno adda met ti pagwadan dagiti annakda.
Innayonna a no napintas ti langen-langen ti tumunggal pamilya iti siyudad ket ad-adda a nasaysayaat met ti komunidad.
Gapu iti daytoy, namnamaen ti nasao nga opisyal nga agsasango a nasayaat dagiti tumunggal pamilya inton bigat tapno ad-adda a mapasayaat ti relaysonda iti tumunggal maysa.
