BAGUIO CITY – Maipasidong iti scrappage program dagiti tradisyonal a parapubliko a jeep iti rehion Cordillera kas paset ti panakaimplementar ti Public Utility Vehicle Modernization Program ditoy pagilian.
Sungbat daytoy ni Atty. Laird Dionel Urbanozo, OIC-Chief Transport Development Officer ti Land Transportation Franchising and Regulatory Board (LTFRB) – Cordillera iti pakaseknan iti gasat dagiti tradisyonal a jeep a masukatan kadagiti moderno a jeep.
Nupay kasta, dinakamatna nga agingga ita ket maur-uray paylaeng ti maipaulog a pagaladagan seknan iti nasao nga scrappage program.
Linawlawaganna pay a saan nga amin a lugan ditoy siudad ket maipasidong iti scrappage program gaputa dagiti maipasidong iti nasao a programa ket agbasar iti panangbigbig ti Land Transportation Office babaen iti Vehicle Inspection System.
Innayonna a saan a magaraw dagiti lugan a masukimat a mabalin paylaeng nga agtaray kadagiti kalkalsada.
Sigun pay kenkuana, agbalin a pribado a lugan dagiti dadduma kadagiti tradisyonal a parapasahero a lugan ken saanen dagitoy a mabalin nga agbiahe.
Impetteng manen ni Atty. Urbanozo a kasapulanen nga agbalin a moderno dagiti parapasahero a lugan tapnu masolusyonan ti isyu iti trapiko.