BAGUIO CITY – Posible a mapasaran ti “traffic delays” nangruna kadagiti control points a sumrek iti central business district apaman a mairugi ti panakaiyimplimintar iti Experimental Traffic Scheme iti siudad.
Daytoy ket tapno maadal a nalaing ti panakailaksid dagiti senior citizen iti Number Coding Ordinance kadagiti partikular laeng a kondisyon.
Iti panakiuman ti Bombo Radyo kenni Police Lieutenant Colonel Zacharias Dausen, dadaulo ti Traffic Enforcement Unit, posible a mangitunda ti panakaitantan ti biyahe dagiti lugan gapu ta kasapulanda a mangipatungpal ti survey apaman nga adda ti maipasardeng a lugan a naglaon ti senior citizen tapno maberipikar nu rumbeng dagitoy a mapalubosan.
Malaksid iti dayta, dakkel metlaeng a karit nu bimmaba dagiti senior citizen nu sadino posible a maipaayan ti ticket dagiti naglugananda nu rumwaren dagitoy iti paset ti central business district a nangitulodanda kadagiti pasaherosda a senior citizen.
we will be coordinating nga sa osca-sa office ng mga senior citizen…a para… just in case para makakuha kami ng data nila kung ilan yung mga senior citizen na may mga sasakyan .
Nupay kasta, kinuna ni PLt. Col. Dausen a mabalin latta a makanselar ti ticket a maipaay kadagiti matiliwan nga aglabsing iti number coding laketdi mapaneknekan a nagitulodda ti senior citizen kadagiti pag-agasan wenno kadagiti pagtrabahoan dagitoy.
Kagiddan dayta, kidkiddawen ni PLt.Col. Dausen iti publiko ti panakaawat dagitoy seknan iti posible a “traffic delays” kadagiti biahe apaman nga agepektibo ti Experimental Traffic Scheme iti siudad ti Baguio.//Bombo Rob Dominguez
