BAGUIO CITY – Nangrugi idi kalman, December 18 ti baro a traffic scheme iti uneg ti Baguio Public Market.
Iti interview ti Bombo Radyo Baguio, inlawlawag ni Engr. Teodorico Tan, consultant ti Traffic and Transportation Management Committee (TTMC) ti Baguio a paset daytoy ti addang ti siudad kasaruno ti naobserbaraan a panagadu manen dagiti market-goers ita a holiday season.
Sigun kenkuana, dagiti lugan a nakaparada iti deppaar ti Hilltop Street ket rumwar iti Zandueta Street bayat a dagiti taxi units ket rumwar iti Magsaysay Avenue wenno iti Zandueta Street.
Maisimpa metlaeng ti agserbi a paradaan para kadagiti pribado a motorsiklo iti deppaar ti Hilltop Street.
Nupay kasta, inyapelna kadagiti market-goers a no saan a nadagsen ti gatangenda iti merkado publiko ket saandan nga agitugot ti luganda nangruna ta limitado dagiti nabigbig a paradaan sadiay.
Impettengna a limitado ti oras ken espasyo a nailatang a pagparadaan dagiti market-goers isut gapuna a no mabalin ket saanda a lumabes iti dua nga oras ken agingga laeng iti 30 a minutos ti panagparada dagiti addaan lugan.
Inkarina nga idanunda met iti TTMC ti kiddaw a panakailatang ti taxi stand iti deppaar ti Upper Kayang.
