BAGUIO CITY – Nakasagana metten ti La Trinidad Municipal Police Station a mangiwanwan iti trapiko sadiay kagiddan ti manamnama a panagadu dagiti turista nga agturong iti munisipyo ti La Trinidad, Benguet kagiddan ti panakarambak ti makabulan a Panagbenga iti siudad ti Baguio.
Sigun kenni PCI Benson Macli-ing, hepe ti La Trinidad PNP, addan ti insaganada a traffic deployment plan para iti nasao a pakaseknan nangruna ta manamnama nga adu a turista ti agturong iti nalatak ng Strawberry Farm.
Kinunana a saanda nga itulok a maulit dagiti pasamak kadagiti napalpalabas a tawen nga immilet unay ti gunay ti trapiko sadiay gapu iti panagturong dagiti adu a turista iti Strawberry Farm.
Dinakamatna a mailukat dagiti alternate routs nga agturong iti Strawberry Farm kas iti Longlong Road no agtaud dagiti lugan iti siudad ti Baguio bayat a mabalin a rumuar iti Pico Road wenno Buyagan Road dagiti lugan a sumrek iti Strawberry Farm manipud iti batog ti Last Gate ti Benguet State University (BSU).
Innayonna a kinasaritadan ti BSU tapnu mailukat ti Last Gate tapnu iti uneg ti agserbi a paradaan dagiti bus dagiti turista nangruna ta saanen nga agbalin ti paradaan ti Benguet AgriPinoy Trading Center.
Agtalinaed met ti implementasyon ti number coding scheme sadiay tunggal weekends bayat a manamnama nga adda dagiti kanayonan a signages a maimuntar iti nagduduma a kalsada sadiay La Trinidad tapnu adda ti mangigiya kadagiti motorista.
