BAGUIO CITY – Masukatanen iti baro ken moderno a traffic lights ti amin a traffic signals a naimuntar iti entero a siudad ti Baguio.
Kinumpirmar daytoy ni Engr. Ted Tan, Adviser/Consultant ti Traffic and Transportation Management Committee (TTMC) ti Baguio iti panakiuman ti Bombo Radyo Baguio.
Nakitaripnong met daytoy kadagiti stakeholders para iti panakaipinal ti specifications dagiti magatang a traffic lights.
Immuna iti daytoy, inaprobaran ti Department of Public Works and Highways ti kiddaw a pondo ti lokal a gobyerno para iti nasao a proyekto.
Sigun kenni Engr. Tan, partikular a masukatan iti LED dagiti agdama a traffic lights sadiay Maharlika, Harrison Road, Centermall Junction, Legarda-Cariño Road ken iti baba a paset daytoy, Naguilian-Bokawkan Road ken Naguilian-Ferguson Road.
Impanakkelna nga adaan ti makunkuna a central intelligence ken kapabilidad dagiti baro a traffic lights gaputa maidesignar ti command center a makatulong iti panagwanawan dagitoy.
Kinunana pay a dakkel ti processor dagiti nadakamat a kagawaan a makairekord iti ad-ado a programa kas maysa a server a mang-akomodar iti nasurok 50 nga intersections ti kalkalsada.
Makabilan iti emergency green wave dagiti traffic lights para kadagiti ambulansia, fire trucks ken police mobiles kabayatan ti emerhensia.
Panggep a maadaptar ti actuated traffic signal wenno ti smart traffic signal tapno ad-ado pay ti masilawan dagiti maimuntar a traffic lights.
Maimuntar pay ti kanayonan a CCTV cameras kadagiti nadakamat a lugar malaksid iti agdama a CCTVs manipud iti Command Center tapno mairekord nga umno dagiti insidente kadagiti kalkalsada.
Karaman pay iti pagnumuanda iti DPWH ti konsiderasion para iti countdown timer iti specs dagiti magatang a traffic lights para met kadagiti pedestrians.
