Manamnama a ngumato ti transmission charge kadagiti electricity bills dagiti power consumers iti Luzon, Visayas ken Mindanao ita nga Agosto 2026.
Sigun iti National Grid Corporation of the Philippines (NGCP), ngumato daytoy iti 22.22% wenno P1.7560 tunggal kilowatt-hour (kWh).
Nangatngato no idilig iti P1.4367 tunggal kilowatt-hour (kWh) idi napalpalabas a bulan.
Inlawlawag ti NGCP a ngimmato daytoy gapu iti nakaro a panagngato ti ancillary services (AS) rates.
Inyunay-unay ti grid operator nga awan ti magun-odna iti AS ken saan a magunggonaan iti aniaman a panagbalbaliw ti presio ti AS.
Daytoy ket gaputa direkta a maipatulod dagitoy kadagiti generation companies nga addaan iti bilateral contracts iti NGCP, ken iti Independent Electricity Market Operator of the Philippines (IEMOP) para iti AS a nagtaud iti Reserve Market.
Kabayatanna, kinuna ti NGCP a ngimmato met ti transmission wheeling rate, wenno ti bayad iti panangipaay iti koriente babaen ti transmission grid, manipud P0.5044 tunggal kWh idi Hunio agingga iti P0.5436 tunggal kWh idi Hulio.
