BAGUIO CITY- Nabigbig ti transportasyon kas kangrunaan a pagtataudan wenno rason ti air pollution iti munisipyo ti La Trinidad, Benguet ka maibasar iti resulta ti Air Quality Diagnostic Study nga impatungpal ti Clean Air Asia.
Rimuar iti nasao panagadal a dagiti heavy duty trucks ti kangrunaan a mangipugpugso iti traffic nitrogen oxide ken sarunoen daytoy dagiti jeep ken bus.
Agtataud met ti sulfur dioxide emissions kadagiti light good vehicles a sarunoen dagiti heavy duty trucks, buses ken jeeps.
Iti naipatungpal nga Regional Meeting mainaig a napaoloan ti Strengthening Knowledge and Actions for Air Quality Improvement, inaklon ni Dang Casanova manipud iti nasao a non-governmental organization ken coordinator ti La Trinidad a manu a tawen ti binusbosda tapnu makompleto ti datus.
Nakiyumanda metten kadagiti maseknan nga stakeholders ti munisipyo tapnu mabigbig ken maipangruna dagiti aksion a mainayon iti Clean Air Action Plan (CAAP) ti La Trinidad.
Karamanen ditoy ti panapasayaat ti parapubliko a transportasyon, panakaital-o ti non- motorized transport ken pedestrianization, ken ti pannakatibker ti implementasyon ti emission standards, inspection and maintenance, ken monitoring.
Iti nasao nga panagadal, karaman pay ti Faridpur, Bangladesh; Erdenet City, Mongolia; Peshawar ken Sialkot, Pakistan; Ho Chi Minh ken Vinh Yen Cities ti Vietnam kadagiti lugar a naipasidong iti proyekto a mapapigsa dagiti pakaammo ken aksion para iti panakapasayaat ti kalidad ti angin malaksid iti La Trinidad, Benguet.
