BAGUIO CITY – Saanen a mangipaay iti travel authority ken medical clearnace ti lokal a gobierno ti La Trinidad kadagiti residente nga agbiahe iti ruar ti Benguet mangrugi inton Oktubre 26, aldaw ti Lunes.
Maibasar iti pammilin ni Mayor Romeo Salda, paset daytoy ti pannakapalukay ti panaggaraw dagiti residente dagiti lugar a maipaspasidong iti general community quarantine (GCQ) ken modified general community quarantine (MGCQ)
Nakalanad iti pammilin a masapul latta ti Health Declation Form kadagiti agbiahe iti uneg ti Benguet.
Sigun iti mayor, mangipaay latta ti munisipio iti travel authority ken medical clearance no kasapulan daytoy iti lugar a pagturongan ti maysa nga indibidual.
Nupay kasta, saan a mapalubusan nga agbiahe dagiti tattao nga addaan iti panateng, uyek ken dadduma pay a sakit.
Kinuna pay ti mayor a masapul a maipasidong iti swab testing dagiti agturong sadiay La Trinidad manipud kadagiti High Risk Areas ken masapul pay a mangipakita dagitoy iti Medical Clearance sakbay a makastrekda iti munisipio.
Nakalanad pay iti pammilin a masapul nga agrehistro iti online dagiti agtartarigagay nga agturong sadiay La Trinidad, Benguet.
