BAGUIO CITY – Manarimaan ti panakaiproseso ti tree-cutting permit dagiti natay a kaykayo iti siudad ti Baguio, pakairamanan ti puton ti kayo a nagtaudan ti sanga a nangtupak iti tiyan ti maysa a balasitang sadiay Camp John Hay idi napalabas a lawas.
Iti panakiyuman ti Bombo Radyo kenni Carlos Arida Sr., dadaulo ti Provincial Environment and Natural Resources Office – Benguet, kinunana a ti puon ti kayo a nagtaudan ti sanga ket karaman iti maikadwa a batch dagiti natay a kayo a nakalinya nga ipaputed ti John Hay Corporation.
Kinunana a nalpasen ti tree-cutting permit ti 239 nga immuna a batch dagiti natay a puon ti saleng iti masakupan dagitoy a naipasidong iti imbentaryo.
Nupay kasta, dinakamatna nga adda manen dagiti nakitada isut gapuna a dagitoy ti naituding a maipaputed ken maikidkiddawan ita iti tree-cutting permit.
Naamuan nga addan ti saritaan ti pamilya ti biktima a pimmusay ken ti maseknan a korporasyon ken manarimaan paylaeng ti imbestigasyon ti City Environment and Natural Resources Office – Baguio iti napasamak nga insidente.
Maipalagip a pimmusay ti 16-anyos a balasitang gapu iti nakaro a dunor nga intunda ti panakaitupak ti sanga ti saleng iti tianna kabayatan ti panag-iddana iti sirok ti nasao a kayo.
