BAGUIO CITY – Agtaltalinaed ita iti pagagasan ti maysa a tricycle driver kalpasan a nabagsol daytoy sadiay Calaba, Bangued, Abra.
Nabigbig daytoy a ni Jeffrey Bicarme, 40-anyos ken residente ti Palao, Bangued, Abra.
Maibasar iti inisyal nga imbestigasyon, inabangan ti dua a lalaki ti tricycle ti biktima manipud town plaza ti Bangued ken nagpaitulodda sadiay Barangay Calaba.
Apaman a nakadanunda iti nasao a lugar, bimmaba dagiti dua a suspek ken inasitganda ti biktima tapnu agbayad ngem maysa kadagiti suspek ti killaat a nangbagsol iti biktima.
Naglibas dagiti suspek bayat nga intaray ti biktima ti bagina iti pagagasan.
Nagsagrap ti biktima iti maysa a bagsol iti barikung ken sugat iti kanigid ng ima.
Agtultuloy met ti imbestigasyon dagiti pulis iti nasao a krimen.
