BAGUIO CITY – Pimmusay ti maysa a tricycle driver bayat a nadangran ti pasaherona iti panagdinnungpar ti imanmanehona a tricycle ken maysa a mixer truck sadiay Matit, Malamsit, Peñarrubia, Abra idi malem kalman.
Nabigbig ti pimmusay a ni Renil Bragado Borreta, 40-anyos bayat a nabigbig ti nadangran a ni Marian Andres, 38-anyos, agpada a residente ti Maoay, Bangued, Abra.
Maibasar iti inisyal nga imbestigasyon ti pulisya, daldalyasaten ti tricycle ti pasang-at a paset ti kalsada iti Barangay Malamsit idi aksidente a nakadinnungparna ti makasabatna a mixer truck nga imanmaneho ni Hernando Andres, 39-anyos ken residente ti Sappaac, Bangued, Abra.
Nagresulta ti insidente iti dagus nga ipupusay ni Borreta bayat a nagsagrap ti sumagmamano a dunor ti pasaherona a dagus met a naitaray iti ospital.
Adda metten iti kustodiya ti pulisya ni Andres kalpasan a simmuko daytoy.
Naamuan pay iti imbetigasyon ti pulisya a human error ti rason ti napasamak nga insidente.
