BAGUIO CITY – Magagaranen nga agawid kadagiti pamilyada dagiti tropa ti gobyerno nga adda sadiay Marawi City kasaruno ti deklarasyon ni Pres. Rodrigo Duterte a nawayan ti nasao a siudad.
Iti panakiuman ti Bombo Radyo kenni PSupt. Mario Mayam-es, commander ti second battalion ti PNP-Special Action Force, kinunana a high morale dagitoy ita kalpasan ti deklarasyon ti presidente.
Kinunana a tarigagayda a malpas ti clearing operation ken maparmek dagiti nabatbati a terorista sadiay Marawi tapnu makaawid dagitoy.
Kinunana a kayatnan a makadwa ti pamilyana ken maarakop dagiti annak daytoy.
Inaklonna met nga iti baet ti panakapapatay dagiti dua a lider ti Marawi Siege ket saanda a mabalin nga agbalin a kampante agingga a saan pay a simmuko dagiti nabatbati a terorista sadiay.
Innayunna pay a sumagmamano kadagiti nabatbati a terorista ket suicidal wenno dagiti mas pilienda ti matay imbes a sumuko iti gobyerno.
