BAGUIO CITY – Im-imbestigaran paylaeng ti pulisya ti pakabigbigan ken motibo dagiti suspek a nangpalpaltog iti maysa a truck driver sadiay Km. 28, Caliking, Atok, Benguet idi agsapa kalman, Pebrero 8.
Nabigbig daytoy a ni Crisanto Pias Kiblasen, 27-anyos, baro ken residente ti Sadsadan, Bauko, Mountain Province.
Maibasar iti report ti Atok Municipal Police Station (MPS), manarimaan ti panagbiahe ti biktima ken dua a kasinsinna babaen iti forward truck paturong iti La Trinidad, Benguet.
Naamuan nga imanmaneho ti kasinsin ti biktima ti nasao a lugan ken agturongda kuma sadiay Pangasinan tapnu agala ti abono.
Apaman a nakasangpetda iti nakapasamakan ti insidente, killaat nga adda ti brown nga SUV a nangbangen iti kalsada a rason tapnu sumardeng ti truck.
Kalpasanna, immasideg iti truck dagiti tallo nga armado a lallaki ken imbilinda a bumaba ti biktima ken dagiti dua a kasinsinna.
Apaman a nakababa dagiti tallo, imbilin ti maysa kadagiti suspek a tumaray dagiti dua a kasinsin ti biktima sakbayda a pinalpaltogan ti mismo a biktima.
Nagsagrap ti biktima iti adu a tama ti bala ti paltog.
Sigun pay iti Atok MPS, idi 2019 ket natiliw ti biktima iti buy-bust operation iti siudad ti Baguio ngem naibasura ti kaso.
Naamuan pay a drug surrenderee ti biktima sadiay Bauko, Mountain Province.
