BAGUIO CITY- Pimmusay ti maysa a truck helper kalpasan nga inatalan daytoy ti mismo a Cargo Truck a pagpapaayanna sadiay Upper Poblacion, Tuba, Benguet.
Nabigbig daytoy a ni Gerald Cauan, 43-anyos, naasawaan, ken residente ti Shamolog, Pico, La Trinidad, Benguet.
Nabigbig met ti driver ti Cargo Truck nga addaan iti plaka a RAH 173 a ni Alex Gonzalgo Cuenco, 47-anyos,naasawaan, ken residente ti Pines Park, Balili, La Trinidad, Benguet.
Maibasar iti imbestigasion, dumaldalyasat ti nasao a truck paturong sadiay La Union idi napukawan daytoy iti preno.
Gapu iti buteng ti truck helper ket limmagto daytoy iti ruar ngem naatalan daytoy ti makanawan a pilid ti lugan a nangitunda iti dagus nga ipupusay daytoy.
Simmuko met ti maseknan a driver iti Tuba MPS kalpasan ti insidente.
