Inaprobaranen ni U.S. President Donald Trump ti panangipatulod kadagiti military weapon idiay Ukraine tapno suportaran daytoy kontra iti agtultuloy a panagbomba nga inaramid ti Russia.
Sigun kenni Trump, serioso isuna nga ikonsiderar ti panangsuporta iti Senate bill a mangipakat iti naing-inget a sanction iti Russia ken dagiti pagilian nga agtultuloy a makinegosio iti daytoy.
Iti White House briefing, kinuna ni Trump a mapukpukawen ti anusna kenni Russian President Vladimir Putin bayat nga agtultuloy nga umad-adu ti bilang dagiti indibidual a matmatay gapu iti giera.
“I’m not happy with Putin. I can tell you that much right now,” ani Trump.
“We get a lot of bullshit thrown at us by Putin … He’s very nice all the time, but it turns out to be meaningless.”
U.S. President Donald Trump
Kabayatanna, impeksa met ni Ukrainian President Volodymyr Zelenskiy a palawaenda ti koordinasyon iti Estados Unidos tapno mapapartak ti isasangpet dagiti armas, nangruna ti air defense.
Agtultuloy metlaeng ti panagkiddawna iti nadagdagsen a “sanction” kontra iti Moscow tapno mapilit daytoy a mangisardeng iti opensiba.