LA TRINIDAD, BENGUET – Saan nga impagarup ni Crael Beniasan Lawa a maysa daytoy kadagiti tallo a Summa Cum Laude ti Benguet State University ita a tawen.
Ni Crael ket agtawen iti 23-anyos, residente ti La Trinidad, Benguet ken tubo ti Buguias, Benguet.
Nagala daytoy iti kurso a Bachelor of Science in Development Communication.
Ni Crael ket anak da Crescencio Lawa ken Editha Lawa, sigud a disposer ti nateng idiay La Trinidad, Benguet.
Lima dagitoy nga agkakabsat, isuna ti maikappat ken kakaisuna iti pamilyada a nakagun-od iti Summa Cum Laude.
Iti interview ti Bombo Radyo, inaklon ni Crael a saanna a ninamnama a magun-odna ti nasao a pammadayaw ngem agyamyaman daytoy gapu ta nagbunga ken nasubadan dagiti rigat ken sakripisyonna idi agad-adal daytoy.
Kinunana a namintinarna ti grado a 98 – 100 babaen iti anus ken dedikasyonna nga agadal.
Imbinglayna pay dagiti inar-aramidna idi agad-adal daytoy kas iti panagreviewna iti naulimek a lugar, naanus nga agisumiter iti requirements, saan nga agdardaras nga agaramid kadagiti proyekto ken kanayon a sigsiguradoenna a napintas dagiti output nga aramidenna.
Impeksana a daytoy metlaeng ti inar-aramidna idi agad-adal daytoy iti elementarya ken sekondarya rason a kanayon a Top 1 iti klase.
Inaklon met ni Crael a nakapadas daytoy iti mental ken emotional breakdown nangruna idi nastroke ti amana idi 2021 ken pimmusay met ti inana gapu iti COVID-19 iti kapada metlaeng a tawen.
Nupay kasta, babaen iti tulong ti namarsua ket nabaelanna amin dagitoy pannubok iti biagna.
Nagbalin metlaeng a motibasyon ni Crael dagiti pammagbaga ti inana nga aramidenna dagiti pagragsakan ken pagsayaatanna.
Nangipaay met ni Crael iti mensahe kadagiti estudyante nga agbalin dagitoy a determinado iti panagadalda; aramidenda dagiti kabaelanda ken masapul nga aganus ken aggaget dagitoy.
Iti agdama ket saan pay nga ammo ni Crael ti sumrekanna kalpasan a nagturpos daytoy ngem kararagna a maisabet ti napintas nga oportunidad para kenkuana.
