Nagresulta iti pannakatiliw manen ti maikadua a gundaway iti tallo pulo ket lima-anyos a dental assistant, tubo iti Bonuan, Gueset, Dagupan City, Pangasinan iti cyberpatrolling effort iti Regional Anti-Cybercrime Unit-Cordillera kalpasan a naduktalan a maysa a peke a dentista wenno naglabsing iti Republic Act No. 9484 wenno ti Philippine Dental Act of 2007.
Sigun kenni Police Captain Denver Mayuga iti RACU Cordillera, ti suspek ket natiliw metlaeng iti kapada a kaso idi May 18, 2025 ngem gaputa saan a napaneknekan ket nawayawayaan daytoy ngem naka-probation. Nupay naipasidong daytoy iti probation ket inaramidna manen ti kapasa a kaso.
Sigun kenni Mayuga, agpada a modus ti inaramid ti suspek nga isut nakatiliwanna iti maysa a pagdagusan iti Malcolm Square, Baguio City idi March 9, 2026.
Daytoy ket babaen iti panagaramatna iti social media a mangidiadiaya iti serbisio nga isu met ti inaramat dagiti kameng ti pulisia tapno ma-engage ti suspek.
Posible a makasuan ti suspek iti panaglabsing iti Republic Act No. 10175 wenno Cybercrime Prevention Act of 2012. Kaspangarigan adda ti agparang a complainant ket posible a dumagsen pay wenno manayunan ti kaso a sangwenna, pakairamanan ti probation rules.
Ti lugar a pangipapaayanna ti serbisio ket idiay Pangasinan, La Union, Nueva Ecija ken dadduma pay a lugar.
Iti sabali a bangir, nakumpiskar manipod iti suspek ti kagaawan a pakairamanan iti maysa a box iti rubber, maysa a pad braket, maysa a short bracket plier, maysa nga excavator, maysa a long bracket plier, maysa a mathieu, maysa a plastic mixer, maysa a mixing bowl, maysa a retractor, maysa a cement liquid ken maysa a plier.
Agpalpalagip met ni Mayuga iti publiko seknan kadagiti maidiadiaya a serbisio nangruna nu saan a lisensiado ti mangisayangkat.
Iti agdama, agtaltalinaed iti ikut iti Regional Anti-Cybercrime Unit-Cordillera Administrative Region (RACU-CAR) ti nasao a suspek.| via Bombo Noveh Organo
