Impasigurado ni Migrant Workers Secretary Hans Leo Cacdac ti dagus a pannakaipaay ti tulong kadagiti 40 Filipino seafarers a napukawan iti trabaho gapu iti maatap a panaglabsingda iti U.S. immigration policy.
Sigun kenni Senador Raffy Tulfo, inakusaran ti US Immigration and Customs Enforcement (ICE) dagiti seafarers a nang-access kadagiti pornographic materials, iti laksid ti kinakurang ti umdas nga ebidensia.
Mainaig iti dayta, manamnama nga ipaayan ti DMW ken OWWA dagitoy iti legal assistance, employment facilitation, ken pinansial a tulong manipud iti “DMW AKSYON Fund” kas temporario a suporta.
Maipaayan metlaeng dagitoy iti reintegration assistance, pakairamanan ti training ken upskilling programs tapno dakkel ti gundawayda a maaddaan iti trabaho, lokal man wenno ballasiw-taaw.
Kabayatanna, inawagan ni Senate Committee on Migrant Workers chairman Tulfo, dagiti baro a nadutokan nga ambassador ti Department of Foreign Affairs (DFA) nga ipangpangrunada ti pagimbagan dagiti overseas Filipino workers (OFWs), nangruna dagiti seafarers a napapanaw iti Estados Unidos nga awan ti maiparbeng a proseso.
Impaganetget pay ni Tulfo a kasapulan a makikoordinar dagiti opisyal kadagiti host country tapno agpatingga ti illegitimate passport confiscation dagiti OFWs, a kangrunaan nga isyu iti Middle East.
