BAGUIO CITY – Kiniddaw manen ni Mayor Benjamin Magalong ti tulong dagiti kapitan dagiti barangay ti Baguio iti agtultuloy a pananglaban ti siudad iti COVID-19 pandemic.
Sigun kenkuana, nasken a nainget nga iyemplementar dagiti kapitan ti panagsurot dagiti umili iti masakupan dagitoy a barangay iti minimum public health standards.
Kinunana a dakkel daytoy a makatulong iti panakasalwad dagiti indibidual manipud iti panakaimpeksionda wenno saan ket panangiwarasda iti corona virus.
Imbilinna metlaeng ti panang-allukoy dagiti kapitan kadagiti residente iti masakupanda para iti panagpabakuna ken panangkompleto dagitoy iti bakuna.
Innayonna a no posible ket nasken a siguraduen dagiti kapitan nga amin a senior citizens iti masakupanda ket nakarehistro iti bakuna.baguio.gov.ph tapnu mabakunaan dagitoy kontra iti COVID-19.
Sigun pay kenkuana, kasapulan nga impormaran dagiti kapitan ti Health Services Office no adda dagiti umili iti masakupanda a bed-ridden wenno saan a makapan kadagiti pagbakunaan tapnu mismo a ti mobile vaccination team ti mangdanun iti pagtaengan dagitoy.
Kiniddaw pay ni Mayor Magalong ti panakikoordinar dagiti kapitan kadagiti pulis iti panakaiwanawan ken panakabigbig dagiti saan a residente ti Baguio nga agpabpabakuna kadagiti vaccination sites ti siudad babaen iti panag-aramat dagitoy iti peke a dokumento.
